அப்பன் காட்டிய வழி

அஞ்சாங் கிளாஸ் படிக்காத

அப்பா -
I.A.S. படித்த அதிகாரியை
ஆட்டிப் படைப்பதை
அருகிருந்து பார்த்த
அமைச்சரின் மகன்...

ஜனநாயகத்தின்
சக்தியை புரிந்து கொண்டு
பள்ளிப் படிப்பிற்கு - முற்றுப்
புள்ளி வைத்து விட்டு...

சோடா பாட்டில் அடித்தல்;
சைக்கிள் செயின் சுழற்றுதல்;
உருட்டுக் கட்டை உபயோகித்தல்
ஆசிட் பல்பு வீசியெறிதல் -
ஆகிய...

ஆயகலை அனைத்தையும்
ஐயந்திரிபறக் கற்று -
அடுத்த தேர்தலுக்கு
ஆயத்த மானான்!

~ கவிஞர் வாலி