(தாஜுல் ஸலவாத் என்று ஆன்றோர்களால் சிறப்பித்து ஓதப்பட்டு வரும் ஸலவாத்துக்களின் கிரீடமாய் விளங்கும் சிறப்பான ஸலவாத்தின் மொழி ஆக்கமாக இக்கவிதை எழுதப்பட்டுள்ளது)
அல்லாஹ் ! எங்கள் அருளாளா !
அருமைத் தலைவர் நபிமீது
நல்லார் ஓதும் சலவாத்தை
நாளும் பொழிந்தே அருளாயோ ?
எங்கள் நபிகள் நாயகம்தான்
எழில் மெய்ஞான மணிமகுடம் !
திங்கள் நபிகள் கைகளிலே
திகழும் கொடியே புகழாகும் !
வானப் பறவை புராக்கினையும்
வசமாய் ஏற்றுக் கொண்டவராம் !
வானம் ஏறி மி- ராஜில்
வள்ளல் உன்னைக் கண்டவராம் !
நோய்கள்சிரமம் நொம்பலங்கள்
நொடியில் தீர்க்கும் மருந்தவராம் !
ஆய்வில் அவரின் திருநாமம்
அனைத்து வேதங் களிலுண்டாம் !
தலைவிதி எழுதிய பட்டோலை
தன்னிலும் அவர்கள் பெயருண்டாம் !
தலைவா ! உந்தன் கைஎழுதும்
பேனா விலும்அவர் பெயருண்டு !
அரபிகள் அஜமிகள் அனைவருக்கும்
அவரே தலைவர் ஆகின்றார் !
சுரபிகள் சுரக்கும் அருளொளியில்
சூழ்ந்தவ ரென்றும் இருக்கின்றார் !
மக்கா மதீனா நகரத்தின்
மங்கா ஒளியாய்த் திகழ்கின்றார் !
எக்கா லத்தும் விடிகின்ற
இலங்கா லைஒளி அவரானார் !
முக்கா லத்து முழுமதியாய்
முஹம்மது நபியே ஒளிர்கின்றார் !
நேர்வழி தரும்பே ரொளியாக
நிகரில்லாத் தலை மைஏற்றார் !
பார்புக ழும்அவர் பாதங்களில்
படைப்பினமெல்லாம் அடைக்கலமே !
பண்பின் சிகரம் அவரானார் !
பரிந்துரைக் கும்பொறுப் பைஏற்றார் !
அன்பின் மிகுதிப் பாட்டதனால்
அள்ளிவழங்கும் அருளானார் !
வானவன் அவர்க்கு இமையானான் !
வானவர் ஜிப்ரீல் துணையானார் !
கோனவன் சந்நி தானத்தில்
கொண்டுபோய்ச் சேர்க்கும் புராக்நபிக்கு
வாகனம் ஆனது; மி-ராஜே
வானப் பயணம் ஆனதுவே !
சித்ரத்துல்முன்தஹா தானமென
சிறக்கும் நபிகள் வாழியவே !
உதிரத் தேட்டம் ஒருவனையே
ஓடிச் சென்று அடைவதுவே !
மன்னர் நபிகள் நாயகமே
மற்றைய நபிக்கெலாம் மன்னரென
விண்ணில் இறைவன் விதித்திட்டான் !
விரியும் அருளால் பணித்திட்டான் !
முத்திரை ஒன்றை பதித்திட்டான் !
"முற்றும்" நபித்துவம் என்றிட்டான் !
நித்திரை யில்நபி வருவதற்கு
நித்தமும் சலவாத் ஓதிடுவோம் !
வறியவர்க் கெல்லாம் துணையாகும்
வள்ளல் நபியைப் போற்றிடுவோம் !
அறியாப் பிழைகள் செய்தோரை
ஆதரித் தேகை கொடுக்கின்ற
நெறியா ளர்நம் ஸபாஅத்தாம்
நெஞ்சத் திற்கு சலாமத்தாம் !
நெஞ்சால் தன்னை நேசிக்கும்
நேயர் இதயத் தாகத்தை
துஞ்சா மல்தீர்த் திடுகின்ற
தூய நபிகள் வாழியவே !
மெய்ஞா னத்தின் சூரியனாய்
மேன்மை அடைந்தவர் சுடரொளியாய்
எஞ்ஞான்றும் நபி விளங்குகிறார்
இறைவா அவருக் கருள்புரிவாய் !
திக்கற்றோரகு திசையானார் !
தீனோர்க் கெல்லாம் வழியானார் !
மக்கப் பதிக்கும் மதீனத்துச்
சொர்க்கப் பதிக்கும் ஒளியானார் !
கிப்லா இரண்டின் இமாமானார் !
கிழக்கும் மேற்கும் ஆளுமிறை
கபூலாக் கும் "துஆ" அத்தனையும்
கண்ணிய நபிகள் பொருட்டன்றோ ?
அலியார் மக்கள் இருவருக்கும்
அருமைப் பாட்ட னாரானார் !
வலிமார் ஜின்கள் கூட்டத்தின்
வானகத் தலைவர் நபியானார் !
காசிமின் தந்தை; அப்துல்லாஹ்
கண்ணின் மணியாய்ப் பிறந்த நபி
எங்கள் நபிகள் நாயகத்தின்
எழில்பூத் திருக்கும் திருமுகத்தில்
திங்கள் கோடி திரண்டிருக்கும் !
திகட்டா மல்கண் பார்த்திருக்கும் !
அண்ணல் நபியின் திருவதனம்
ஆசை யுடனே காண்பதற்கு
எண்ணம் கொண்ட சான்றோரே !
எழில்சல வாத்தினைச் சொல்வீரே !
கன்னல் நபியின் நிழலாகக்
காலங் கழித்த தோழர்களின்
எண்ணம் குளிர சலவாத்தை
எழிலாய்ச் சொல்வீர் சான்றோரே !
சொல்வோம் சலவாத் நபிமீது !
சொர்க்கம் வருமே கைமீது !
வெல்வோம் வாழ்வில் வெற்றிகளும்
விரைந்தே வந்திட விதிமாறும்!
-P.M.கமால் B.A., கடையநல்லூர்
கருத்துகள் இல்லை:
கருத்துரையிடுக